29.11.2017Friedrich Walti
Adväntszyt! Ganzi Liechterchettene sind über de Ychaufsstrosse ’ghanget und i de Hüser het’s nach Wiehnachts-Chrömli gschmöckt. I mängem warme Hinderzimmer het mer au scho uf’s Wiehnachtsfescht g’üebt. Klavier, Gyge, Blockflöte und au Panflöte sind im Ysatz gsy und händ die wunderschöne Wiehnachtslieder begleitet.
S’Kathrinli Imfanger het felsefescht dra glaubt, dass um die Zyt d’Wiehnachtsängel underwägs seige. Es isch es Chind gsy, wo niene me deheim gsy isch, de Vater en Trinker, wo d’Muetter ploget het, und die isch irgend einisch eifach uf und dervo. D’Grosseltere sind us gsundheitliche Gründ nid imstand gsy, s’Kathrinli zue sich z’näh, und so isch es halt zu der Gotte choh. Die isch zwar rächt gsy mit em, aber si het em kei Liebi gäh. Eigentli het s’Kathrinli alles gha, und es het em nüt gfehlt weder d’Liebi, oder besser gseit, en Muetter, wo ihns gärn gha hätt. Muetterliebi cha mer mit nütem uf der Wält ersetze.
I der Sonndigs-Schuel het d’Frau Hüsler es Gschichtli vom e Wiehnachtsängel vorgläse. En Ängel, wo nume am Wiehnachtsobe uf d’Ärde chont und d’Wünsch vo de Chind tuet erfülle. Es schöns Gschichtli, aber die meischte Chind händ natürli scho gwüsst, wer sich um ihri Wünsch kümmeret. Dorum het d’Frau Hüsler no gseit, dass de Wiehnachtsängel d’Müettere bruchi für die Wünsch z’erfülle, wo d’Chind heige.
D’Chind händ denn no dörfe säge, was si sich uf d’Wiehnacht wünsche. Es sind nid emol eso bescheidni Wünsch gsy. Uf jede Fall het’s ganz türi Sache derby gha. Wo s’Kathrinli a d’Reihe choh isch, het’s gseit: «I wünsche mir es Muetti uf d’Wiehnacht.»
Die andere Chind händ s’Kathrinli verstande. Keis het glachet oder de Chopf gschüttlet. D’Frau Hüsler het sich Gwüssesbiss gmacht, dass si das Gschichtli vom Wiehnachtsängel gläse het. Kei Wiehnachtsängel wird em Kathrinli si Muetter wieder bringe, wo gflüchtet isch vor ihrem Ma, wo si versorget händ. Es isch vermuetet worde, dass die arm Muetter über d’Landesgränze us gflüchtet isch, per Autostopp, het mer agnoh. Aber niemer het’s chönne verstoh, dass die Frau s’Kathrinli eifach em Schicksal überloh het. Es isch ietz grad es Johr, sid si gflüchtet isch. A der letschte Wiehnacht isch es passiert. De Ma het si im e Tobsuchts- afall bluetig gschlage. Si isch denn eifach uf und dervo. S’Kathrinli het grad no gseh, wie si de Chilewäg hindere verschwunde isch. Das Chind het sich denn ybildet, dass de Wiehnachtsängel s’Muetti uf em glyche Wäg chönnt zruggbringe wo’s gange isch.
Und so isch s’Kathrinli am Wiehnachtsobe bi der gröschte Chälti under eme klare Stärnehimmel de Chilewäg hindere gloffe und het ganz fescht an es Wunder glaubt. Derby het’s immer gäg em Himmel ue gluegt und de Wiehnachtsängel gsuecht. Leider isch es chrüz und quer uf der Stross ume gloffe.
Und denn isch es passiert. En heitere Schyn, en churze Schmärz und s’Kathrinli isch uf der härte Stross gläge.
Nei, es isch nid tod gsy, nume schüli verschrocke und nümm ganz bin em sälber. Aber ietz het ihn’s de Wiehnachtsängel i d’Arm gnoh und verchüsst.
«Liebs Kathrinli, lueg, dis Muetti isch wieder do», het de Wiehnachtsängel gseit. Aber es isch jo würkli em Muetti si Stimm gsy.
Alles het sich ufklärt. Em Kathrinli si Muetter het äne a der Gränze em ene dütsche Baumeischter si frauelos Hushalt gfüehrt. A der Wiehnacht het sis nümme usghalte ohni ihres Chind. De Gschäftsma het denn ihre Wunsch erfüllt und isch do häre gfahre, wo ihm s’Kathrinli usgrächnet vor’s Auto äne gloffe isch. Er isch gottlob ganz langsam gfahre und näbscht es paar Schürfige isch wyters nüt passiert.
So wyt also d’Würklichkeit. Aber em Kathrinli het’s niemer chönne näh, dass de Wiehnachtsängel ihm s’Muetti wieder brocht het. Und wer weiss, viellicht het de Wiehnachtsängel tatsächli d’Händ im Spiel gha. Uf jede Fall het s’Chrischtchindli eme Chind nie en grösseri Freud chönne mache.
